JADI CALO TRADISI

“JAN bapaliang!”
“Bapaliang kama?”
“Sarupo pimpiang.”
“Ka angin nan kareh. Inyo bapaliang!”
“Biaso, urang nan indak bapandirian”.
“Di ma nan kabalabo”.
“Rancak jadi kapindiang”.
“Bia taimpik paruik kanyang”.
Mangkutak, maetong-etong bintang nan panah inyo tarimo. Bintang nan inyo simpan dalam puro-puro kain balati. Puro tradisi nan inyo baok kian kamari. Alah lusuah.
“Ijan fanatik bana!”
“Fanatik ba a?”
“Sarupo taruang bulek basala.”
“Awak sae nan batua. Awak sae nan andia. Urang lain, indak! Inyo sajo nan suko bakuburan”.
Malanca manulih jo darah. Inyo suko mambaco nazam nabi bacukua. Inyo suko bacamin. Bacamin jo camin ratak. Indak nampak mukonyo kasado-e. camin ratk ikuik jo roman-romannyo ratak. Awak paca-I kaca. Karano muko awak buruak. Bacapuak-capuak sarupo mandapek panyakik caca.
“Kasiapo awak berang?”
“Ka diri awak surang!”
“Ba a mangko baitu?”
“Itu tradisi inyiak moyang, ambo!”
“Sajak pabilo?”
“Sajak raso malu inggok di siko.”
“Raso malu?”
“Iyo!”
Apo puloko! Ba malu-malu juo lai, we-e. indak tau jo matoari we-e komah! Satarang bandarang iko ari. Inyo sangko, sanjo juo. Sadang mak Datuak indak pamalu lai! Inyo juo arato pusako.
“Ta kantang den!”
“Ba a mangko takantang?”
“Abih buah den!”
“Karano apo?”
“Alah lamo indak makan sayua lobak singgalang”.
“Bika si Mariana, baa?”
“Antri pulo mambalinyo, kini.”
“Itu tando laku”.
“kok laku galeh awak, beko lai pulo calo”.
Mangkutak sarupo laying-layang putuih talinyo. Inyo kini, alah jadi calo tradisi pulo.calo seni jo budayo tradisi baruntuang awak. Dapek pulo maliek-like nagari urang. Tantu jo oangkoih perai.
“Mangkutak kunci inggirih, komah!”
“Iyo, iyo sagalo bauik sasuai”.
Ondeh mandeh. Ondeh mak. Ondeh biai. Awan barark di pinggang Marapi jo Singgalang. Saluang jo nyanyi urang Kamang pai bakayu mandayu-dayu.

Rusli Marzuki Saria
Harian Haluan Minggu, 5 Mei 2002

Posted by Nasrul Azwar di  http://www.parewasatosakaki.blogspot.com/

ALAH BAREFORMASI PULO PARIUAK BAREH

BACURITO, mengecek-ngecek, menyampaikan kaba, jo bahasa amai, bahaso induak, bahaso mandeh, taraso padek. Awak salamo ko alah mambuek bahaso induak awak jadi bahaso kaduo. Labiah-labiah sarupo awak nan lah manjadi panduduak kota, jadi urang urban marantau sabanta. Kutiko hari baiak jo bulan baiak, awak pulang kampuang maingahan pusaro jo hari rayo.
“Parewa!”, sogah sorang kawan lamonyo Udin Kacang Miang. ”Alah ongeh bana parewa kini, baru merantau dakek, alah balu bagua pulo”. Parewa, manuruik kamuih, aratinyo panjahek jo parusuah. Tapi dalam masyarakaik Minang arati positifnyo lai agak rancak: pambaok pambaharuan inovatif dan panantang aruih.
“Waang iyo Udin bana”, Parewa jo suduik mato mamandang ka si Udin. Baa mangko si Udin disabuik Udin Kacang Miang, karano inyo jo kalakuannyo manggata sajo. Pantang tagisia awak gata-gata dek inyo.
“Baa Din, alah bareformasi pulo pariuak bareh awak”, Parewa galak tasengeang jo muncuangnyo nan manjungua.Tangah hari bayang-bayang indak tampak, matoari tagak luruih, udaro alangkah panehnyo.
“Aden kalampasiangan kini”, Udin malirik Parewa. ”Baa ka indak pusiang, anak-anak den nan lah jadi sarjana tu kini alah kanai pehaka pulo, baru duo jo tigo tahun ko bakarajo”, Udin mangipeh –ngipeh mukonyo, udaro taraso angek, angin indak barambuih.
Parewa mangalamun sabanta. Taringek jaman-jaman sulik tempohari. Kutiko jaman Japang, payah mancari bareh. Urang kampung pai karajo paso mambuek palabuhan kapa tabang Gaduik Bukittinggi. Ado pulo nan dikirim ka Logas mambuek jalan kureta api. Japang kalah, nagari awak maradeka, tapi bareh maha, tigo puluah rupiah saliter. Banyak pulo rakyat nan mati. Indak panah tambilang jo pangayuah mangaso.
“Jauah bana pangana tu, Parewa!’, Udin saketek mancibia. Kaliektannyo hari ka hujan. Gabak alah nampak jauah di parbukitan. Angin barambuih dari arah lauik, kadang-kadang langkisau bagageh pulo.
“Baa ka indak, lamo iduik banyak dirasai, pamilu 55,aden alah sato juo tu, banyak juo paratai ampaia samo jo pamilu 99 ko”, Parewa sarupo batutai-tutai didanga dek si Udin.
“Iyo lamak jadi anggota taromaik kini”, lantun Udin Kacang Miang manciloteh. Karano dibaconyo di koran-koran lokal, honor anggota nan taromaik tu ka naiak hampia tujuah juta rupiah.
“Bara kali lipek naiaknyo dari honor anggota nan taromaik jaman orde baru tu, ayah!”, Parewa senyum dikulum, dan diam. Di dalam utaknyo babega-bega kato-kato rancak. Baru anam bulan duduak dirinyo sajo nan inyo uruih, apo nasib rakyaik nan mamiliahnyo alahnyo parjuangkan?. Ado nasib nan kanaik daun, katiko banjie gadang rumpuik saruik naiak ka ateh batang karambia. Manga tacangang bana, tunggu-tunggu se lah banjia bandang.
“Wee palaih bana komah!”, sogah Ciek Uniang nan lah lamo manunggu kasampatan mangecek sajak tadi. Uniang parampuan barusia 50-an, tapi ruponyo awet. Barangkali inyo tamasuak parampuan nan sanang, indak bakarajo kareh sarupo parampuan patani di nagari awak.
“Ajo Udin palupo jo sajarah komah,” lantun Ciek Uniang manambahi. Di kapalo Ciek Uniang batumpuak-tumpuak pulo curito tantang masalah parampuan. Indak tantang Dharma Wanita doh, tapi tantang hak-hak wanita dalam gender. Kini kan musim pulo tantang gender, feminisme caro baraiknyo. Sabok Ciek Uniang urang nan suko mambaco, sabab abad 21 ko abad wanita, kato buku-buku nan di tulih dek panulih maso depan.
“Niang, sakali-sakali danga pulolah kaba Bundo Kanduang dan hayati pulo masyarakaik matrilinial, nan basuku jo suku induak”, Udin manyeka paluahnyo. Udin Kacang Miang alah babulan–bulan pulo indak pulang ka rumah amainyo karano amainyo alah lamo maningga. Nan tingga di rumah gadang hanyo kakak-kakaknyo nan padusi jo anak-anaknyo nan alah jadi gadih gadang.
“Jo Udin jan mancimeeh, salamaik tingga jaman Siti Nurbaya, yo!”, Ciek Uniang balalu pulo. Udin Kacang Miang jo Parewa tapana –pana...

Rusli Marzuki Saria


Harian Haluan Minggu, 23 April 2000

Posted by Nasrul Awar di http://www.parewasatosakaki.blogspot.com/

AWAKKO GADANG SARAWA

“KAMA se waang Parewa!”, sentak kakaknyo nan padusi, katiko Parewa indak pulang ka rumah mandehnyo babulan-bulan lamonyo. Kakaknyo nan padusi tu, banamo Rabiah. Baumua sakitar 60-an baranak 4 urang, duo laki-laki dan duo parampuan. Anak laki-lakinyo alah bakaluarga kasadonyo, tapi nan tuo parampuan alah gadih gadang.
“Baa naiak pitam bana, kakak ko,” jawek Parewa. Iyo pulo, bahaso inyo alah lamo pulo indak pulang karumah mandehnyo. Labiah-labiah sajak induaknyo maningga babrapo tahun lalu.
“Lakek sarupo parangko pulo waang di rumah bini, ko mah !”, gareseh kakaknyo Rabiah. Di rumah gadang, parampuan sarupo kak Rabiah memang bakuaso pulo. Kakaknyo alah rusuh karano anak-anaknyo nan padusi alah patuik pulo dicarikan lakinyo. Karano kahidupan sulik, sarupo jaman resesi bataun ko, patuik pulo rumah gadang nan tirih jo anak gadih gadang indak balaki diuruih jo harato pusako.
“Den inok-inok manuangkan awak ko iyo gadang sarawa ko mah!”, Parewa manunjuak ka dadonyo, “lai banyak sarajana awak, tapi nan mangarang tata bahaso Minangkabau ko, urang bule. Awak cadiak malam, bodoh di siang hari. Bule nan mangarang tata bahaso Minang tu, banamo Gerard Moussay. Bataun-taun inyo di nagari awak ko, baraja bahaso Minang dialek Agam, dialek Payokumbuah, dialek Pasisie, dan langkok kasadonyo”.
“ Baa pangana waang kini?”, kecek kakak Parewa, Rabiah.
“Waang uruihlah rumah gadang nan tirih, palakianlah kamanakan nan lah gadih gadang tu!”, tambah kak Rabiah.
Kabuik pagi balun juo tasingkok, Parewa teringek, bara bakuasonyo parampuan di nagari awak ko. Tampa baraja jo masalah garakan parampuan di baraik, tampa mambaco surek-surek Kartini nan nyo kirim kapado Abendanon tu, awak lai punyo Rohana Kudus pulo. Dalam hiduiknyo jadi wartawati surek kaba Suntiang Malayu. Pananyo tajam pulo di jamannyo. Tapi sajarah salalu piliah kasiah, Rohana Kudus sabarih namo basuo di dalam buku nan taba tu.
“Aden pai dulu kak,” mangecek Parewa kapado kakaknyo Rabiah. Parewa bajalan jo kaki sarawa tasenseang kateh. Jalan kampuang alah mulai pulo takalubak aspalnyo, di badan jalan bisa pulo baranang itiak duo-tigo.
“Udin Kacang Miang, manga lamo bana waang maota di lapau ko!, alah putiah pulo aia kopi”, Parewa mambulancikkan matonyo ka si Udin nan sadang mangunyah-ngunyah goreng pisang jo katan sipuluik sirah.
Matohari lah sapanggalah, di lapau-lapau sapanjang jalanan desa tu urang-urang masih maota. Banyak ota tantang reformasi, rupiah dilanyau dek dollar Amerika, demo guru-guru mamintak kenaikan gaji jo tunjangan maaja.
“Tamonok bana waang Parewa!, apo pulo nan basarang di kapalo tu?”, Udin Kacang Miang tagak dari palanta. Angin bulan April nan agak lambok tu, mangipeh-ngipeh lihia bajunyo. Rinai baka datang. Awan bararak di kaki parbukitan.
“Baa ka indak, tapikia di den, lamo awak ka sarupo ko lai?, banyak nagari Asia nan mangalami resesi, ekonomi macet, pitih pinjaman Bank Dunia nan dilibas. Iyo tabarek bana di nagari awak nan tasabuik kayo, bara pangangguran banyaknyo kini, catat angko-angko 40 juta pangangguran, alun lai pehaka nan tiok hari. Baka dicabuik pulo Tap MPR tantang pelarangan kuminih di nagari awak”, Udin Kacang Miang sarupo kadatangan sijundai, batutai-tutai surang. Pangangguran bajadi-jadi, pehaka malelo pulo. Iko iyo tanah subur bana untuak paham kumunih, walaupun kumunih di nagari inyiak moyangnyo alah runtuah.
“Antahlah, Din. Indak tapikiakan di den jo tangkurak ketek, jo sikola batang pisang, jo kalori randah, kalori goreng pisang rajo jo katan sipuluik sirah tu”, suara Parewa mendesis antaro tadanga jo indak…

Rusli Marzuki Sari (Papa)


Harian Haluan Minggu 30 April 2000
Posted By Nasrul Aawar di  http://www.parewasatosakaki.blogspot.com/

POTONGAN KAKI DALAM SEPATU

“BAA UDO ko bagalemak peak sajo ko mah!”, Ciek Uniang manggarutu surang. Awan sanjo bararak diambuih angin, rumah gadang alah condong, sawah jo ladang, arato pusako tinggi tu awak sartifikatkan pulo jo Parona. Inyo sangko, inyo nan malaco sawah jo ladang tu. Sadang inyiak muyang nan malaconyo di zaman Ulando, indak tapikia mambuek surek-surek arato pusako tu.
“Ondeh mak, baa sakasa tu bana kau Niang”, sauik Parewa, karano inyo mangarati bana hiduik susah di kampuang. Tanah-tanah nan rancak alah tajua ka urang kota. Karano tanah jo sawah alah basartifikat, murah bana malegonyo. Indak paralu mangurumahkan anak kamanakan kasadonyo.
“Awak ko iyo rakuih, dek ulah kepeang bantuan desa, bandes dek sari, nagari batuka namo jo desa. Namonyo dimekarkan, sakian ratuh nagari jadi sakian ribu desa”, Parewa malenggok ka Ciek Uniang, kadang-kadang sarato jo cibie. Karano nagari diserbu dek Parona, adaik nan disimir-simir Mak Datuak Lekam tu, lai alah bakilek. Di jaman Orba tu, awak takalok kasadonyo. Nan paralu kepeang masuk nagari awak.
“Lai takana dek udo, lagu tahun ampek limo, kok jadi udo ka Jambi, balikan awak sagalo atom, barang-barang sarupo ikek pinggang dan sikek rambuik nan tabuek dari karah tu, dinamokan Atom”, Ciek Uniang tasenggeang surang. Garimih malam mampacapekkan mato mangantuak, tapi, Udin Kacang Miang alun pulang dari lapau. Inyo asyik juo maota, ota luntang-lantuang kian kamari.
“ Eh, ado potongan kaki di dalam sepatu bot tu!”, saru Udin Kacang Miang ka Parewa. Kajadian tu, sarupo nostalgia ko mah!. Ado namonyo bukik kaluwang, di nagari Tilatang Kamang, itu di tahun 60-an, katiko awak sadang parang sudaro. Parewa sangkek tu mancaliak panembak 12,7 sanjato otomatis nan dipagunokan untuak panembak pasawaik udaro. Sakali-sakali dimasukkan juo ka tantara pusaik. Sakali ko, 12,7 tu manganai kaki tantara pusaik tu, tingga sipatu botnyo nan baisi kaki sakarek.
“Lai malawan tentara pemberontak tu?”, Ciek Uniang basugiro ka manutuik pintu lapaunyo. Parewa tasingguang, inyo sangko awak ko tantara pemberontak nan lari-lari sajo. Lai takana, pasukan Batalyon Zadelberg tu, batalyon bagak parang di Tilatang Kamang.
“Limpaduak”, Udin Kacang Miang, manirukan kato-kato nan parnah kalua dari muluik komandan Batalyon 2003 PRRI tu, nan banamo Benny Zadelberg, Bulando Indo, takato barani baparang di jaman bagolak di Sumatera Baraik ko. Tantara Pusaik mangko pai baparang ka nagari-nagari, sudah tu babaliak ka kota Bukittinggi. Tantara pambarontak sarupo ikan jo aie jo rakyaik di nagari tu. Sejak 4 Mei 58 sampai 59. Tilatang Kamang bisa batahan jo pambarontaknyo.
“Aden indak pangapik daun kunik do,” gerutu Parewa, “awak iyo suko bondong aie bondong dadak. Awak jadi gando dalam diri awak. Muluik mangecekkan iyo, di dalam hati siapo tau. Awak paibo hati, kadang-kadang setimentil sarupo nyanyi Kumbang Cari Nusykan Syarif. Sakali-kali Ati den Taibo, lagu nan takana di tahun 60-an”.
“Paibo hati indak elok, lakeh jadi tuo,” bisiak Udin Kacang Miang, sambia basiap-siap maninggakan lapau. Kalam malam mulai datang, garimih alah mulai usai. Di matonyo tabayang pancuran aie di kaki Sago, aia janiah ikannyo jinak, tapi parang sudaro sadang bajadi.
“Ado mamang, sakali aie gadang, sakali tapian barubah” , Ciek Uniang hampia salasai manutuik pintu lapaunyo. Manusia barubah, alam barubah. Rekonstruksi, maulang baliak latak, iyo paralu. Mangamehi nan baserak, mauleh nan lah putuih, tapi, kok manggosok-gosok, manyemir-nyemir supayo bakilek indak do!.
Parewa jo Udin Kacang Miang berlalu, kunang-kunang batabangan dan cingkariak banyanyi sabana lintuah …


Harian Haluan Minggu, 7 Mei 2000
posted by nasrul azwar
http://www.parewasatosakaki.blogspot.com/